थारकाप उडविणारी घटना नांदुरा तालुक्‍यातील वडनेर भोलजी जवळ सकाळच्‍या पहाटे झोपलेल्‍या मजुरांना ट्रकने चिरडले

नांदुरा:-(आपलं बुलढाणा जिल्हा बातमी-तालुका प्रतिनिधी गजानन बोटुळे)- नांदुरा तालुक्‍यातील वडनेर भोलजी येथील काही मजुरांना दि २ ऑक्‍टोंबरच्‍या पहाटे ५-३० वाजेच्‍या सुमारास भरधाव वेगात येणाऱ्या ट्रकने चिरडले. या घटनेत घटनास्‍थळावर ४ मजुरांचा जागीच मृत्‍यू झाला तर एकाचा उपचारदरम्‍यान मृत्‍यू झाला आहे. असे एकूण पाच मजूर या घटनेत दुर्दैवाने मृत्‍यू मुखी पडलेले आहे
घटनेतील सर्व मजूर हे नागपूर-मुंबई राष्ट्रीय महामार्ग क्र.६ च्या सुरू असलेल्या कामावर गेल्‍या अनेक दिवसापासून काम करत होते. मजूर हे महामार्गाच्या रस्त्यालगत असलेल्या टीनशेडमध्ये राहत असून या टीनशेडमध्ये २ ऑक्टोबरच्या पहाटे ५ वाजेच्या सुमारास पी.बी.११.सी.झेड.४०७४ क्रमांक असलेला आयशर घुसून झालेल्या भीषण अपघातात ५ जण ठार तर८ जण जखमी झाल्याची
घटना वडनेर भोलजी नजीक असलेल्या उड्डाणपुलाजवळ घडली.

याबाबत अधिक माहिती अशी की, राष्ट्रीय महामार्ग क्र. ६ वरून आयशर क्र.पीबी ११ सीझेड ४०७४ हे खामगावकडे जात होते. दरम्यान आयशर वाहनाचा चालक यांचे वाहनावरील नियंत्रण सुटल्याने वडनेर भोलजी नजीक असलेल्या उड्डाणपुलाजवळ राष्ट्रीय महामार्गावर काम करणार्‍या मजुरांच्या राहण्याकरीता उभारलेल्या टीनशेडला आयशरने जबर धडक दिली. या धडकेत प्रकाश मकु धांडेकर (वय २६), पंकज तुळशीराम जांबेकर (वय १९), राजाराम दादू जांबेकर (वय ३५), अभिषेक रमेश जांबेकर (वय १८) सर्व रा.मोरगड ता.चिखलदरा, जि.अमरावती, गुणी भुया भोगर भुया रा.बोरीमतोली तह.गढवा या पाच जणांचा मृत्यू झाला. तर दीपक पणजी बेलसरे, कमल रमेश जांभेकर, अमर बजू, शाम भास्कर सर्व रा.मोरगड, अक्षय कुमार श्री कुमार भैय्या रा.चिनीया तह.गढवा, सतपाल कुमार मलिकचंद रा.बोरी मातोली,महेश मोची रा.बोरी मातोली जि.गढवा, आशिष कुमार निर्मल भुयार रा.बोरी मातोली हे आठ जण जखमी झालेले आहे.सदर जखमींना तातडीने मलकापूर येथील उपजिल्हा रूग्णालयात उपचार सुरू असून पुढील तपास पोलीस करीत आहेत.