देशभर भाजप नेत्यांकडून विजयाचा जल्लोष तर मेहकरात पदाधिकारी कार्यकर्ते भिडले,

मेहकर: आपलं  बुलढाणा जिल्‍हा बातमी-   एकीकडे देशात आणि राज्यात भाजपचा विजयाचा आनंद साजरा करत असताना बुलढाणा जिल्ह्यात भाजपच्या दोन गटात हाणामारी झाली आहे. या घटनेमुळं जिल्ह्यातील भाजप अंतर्गत असणारे वाद चव्हाट्यावर आले आहेत. आज मध्य प्रदेश, राजस्थान आणि छत्तीसगडमध्ये भाजपाला मोठा विजय मिळाला. या विजयानंतर अनेक ठिकाणी भाजपकडून जल्लोष व्यक्त करण्यात आला. आनंदोत्सव साजरा करण्यात आला. मात्र, बुलढाणा जिल्ह्यात मात्र एक वेगळं चित्र समोर आलं. दोन गटात तुफान हाणामारी झाली. त्यामुळे पुन्हा एकदा आजच्या दिवशी तरी हे टाळता आलं असतं का असं बोललं जात आहे.
बुलढाणा जिल्ह्यातील भाजपच्या दोन गटात तुफान हाणामारी झाल्याच पाहायला मिळालं. भाजप कार्यालयात घुसून भाजप विधानसभा संपर्क प्रमुखास बेदम मारहाण करण्यात आली.बुलढाणा जिल्ह्यातील मेहकर येथे प्रकाश गवई विधानसभा संपर्क प्रमुख यांच्या कार्यालयात पत्रकार परिषद सुरु होण्यापूर्वी हा प्रकार घडला. प्रल्हाद अन्ना लश्कर आणि शिव ठाकरे यांच्यासह २० ते २५ लोकांनी प्रकाश गवई आणि अर्जुन वानखेड़े, सारंग माळेकर यांच्यावर हल्ला चढवला. भाजपच्या या कार्यकर्त्यांनी भाजपच्याच पदाधिकाऱ्यांना बेदम मारहाण केली आहे. या कार्यकर्त्यांनी या पदाधिकाऱ्यांना नेमकी कशासाठी मारहाण ते स्पष्ट झालं नसल तरी मेहकर भाजपमधील अंतर्गत वाद या निमित्ताने चव्हाट्यावर आला आहे.दरम्यान, भाजपच्या कार्यालयात सुरु झालेला वाद रस्त्यावर देखील आला. भाजपमधील दोन गटातील वाद पाहण्यासाठी रस्त्यावर स्थानिक नागरिकांनी मोठी गर्दी केली होती.