40 हजारांची लाच घेतांना अभियंत्यासह वायरमनला लाचलुचपत विभागाने केली अटक
मलकापूर :- आपलं बुलढाणा जिल्‍हा बातमी- आरओ प्लांटच्या औद्योगिक वीज मीटरमधून कृषी पंपाला वापरलेल्या विजेबाबत गुन्हा दाखल न करणे तसेच सरासरी देयक कमी करण्यासाठी लाच मागणाऱ्या वीज कंपनीच्या कनिष्ठ अभियंत्यासह वायरमनला अँटी करप्शन ब्यूरोच्या पथकाने सोमवारी दुपारी अटक केली. दोघांविरुद्ध भ्रष्टाचार प्रतिबंध अधिनियमान्वये गुन्हा दाखल करण्यात आला.मलकापूर तालुक्यातील एका गावातील आरओ प्लांट संचालकाने लाचलुचपत विभागाच्या कार्यालयात तक्रार केली.
त्यामध्ये वीज वितरण कंपनीचे ग्रामीण भाग ३ मध्ये कार्यरत कनिष्ठ अभियंता आकाश सुरेश क्षीरसागर, वायरमन महादेव कटू पारधी या दोघांनी विजेच्या चोरीचा गुन्हा दाखल न करण्याबाबत व सरासरी देयक देण्यासाठी ४० हजार रुपये लाच मागत असल्याचे नमूद केले. त्याबाबतची पडताळणी २९ जानेवारी रोजी करण्यात आली. त्यात वायरमन महादेव कटू पारधी यांनी कनिष्ठ अभियंता आकाश सुरेश क्षीरसागर याच्यासाठी पूर्वी ६० हजार रुपये घेतल्याची स्पष्टोक्ती देऊन तडजोडीअंती २० हजार रुपये लाच मागितल्याचे स्पष्ट झाले. १२ फेब्रुवारी रोजी सापळा कारवाईत तक्रारदारावर संशय आल्याने लाच स्वीकारली नाही. मात्र, लाचेची मागणी करण्यात आल्याचे स्पष्ट झाले. त्यामुळे वीज वितरण कंपनीच्या कनिष्ठ अभियंत्यासह वायरमनला सोमवारी अटक करण्यात आली. लाचलुचपत विभागाच्या पथकाने मलकापूर पोलिसांत दोघांविरुद्ध गुन्हा दाखल केला. लाचलुचपत विभागाचे पोलिस निरीक्षक सचिन इंगळे, पोहेकों प्रवीण बैरागी, नापोका जगदीश पवार, गौरव खत्री आदींनी ही कारवाई केली.
