आपलं बुलढाणा जिल्‍हा बातमी- जळगाव जामोद :- विदर्भातील शेतकऱ्यांचे लक्ष लागून असलेल्या भेंडवडची घटमांडणी आज दि. १० मे रोजी संध्याकाळी होणार आहे, तर ११ मे रोजी सकाळी या घटमांडणीची भाकिते जाहीर केली जाणार आहेत. पूर्णा नदीच्या काठी वसलेल्या या गावात घट मांडण्याची परंपरा समारे ३०० वर्षांपासून सुरू आहे. परंपरा सुरू करणारे चंद्रभान महाराज यांचे वंशज पुंजाजी महाराज आणि त्यांचे सहकारी सारंगधर महाराज हे भविष्यवाणी जाहीर करतील.
अक्षय तृतीयेच्या दिवशी संध्याकाळी गावा गावाबाहेरील शेतामध्ये घटाची मांडणी करण्यात येते. दसऱ्या दिवशी पहाटे घटांमध्ये झालेल्या बदलावरून आणि घटाच्या आतील धान्याचे सूक्ष्म निरीक्षण करून भाकीत वर्तविले जाते. त्यावरून पिकाचा आणि पावसाचा अंदाज व्यक्त केला जातो. कोणत्या महिन्यात पाऊस जास्त तर कोणत्या महिन्यात पाऊस कमी सांगितला आहे. यावरून शेतकरी यंदा कोणती पिके घ्यायची हे ठरवत असतात चंदभान महाराज यांनी सुरू केलेली परंपरा पुंजाजी महाराज यांनी कायम ठेवली आहे.गुढीपाडव्याच्या दिवशी सुद्धा गावातील हनुमान मंदिराच्या पारावर पूर्व मांडणी केली जाते. या दोन्ही मांडणीमध्ये साम्य असते. त्यामुळे या दोन्ही मांडणीचे निष्कर्ष एकत्र जोडून ही भाकिते वर्तवली जातात. याकडे सर्वांचे लक्ष लागलेले आहे.
