जिल्हा न्यायालयाच्या इमारतीचा होणार कायापालट !

बुलढाणा :- आपलं बुलढाणा जिल्हा बातमी:-  जिल्हा न्यायालयाची ११५ वर्ष जुनी इमारती पुनर्निर्माण होणार असून, वकील संघाच्या सातत्यपूर्ण पाठपुराव्याला यश मिळाले आहे. बुलढाणा जिल्हा न्यायालयाची मुख्य इमारत सात मजली होणार आहे. अत्याधुनिक सोयीसुविधायुक्त अशी ही इमारत राहणार आहे. पुढील दोन वर्षाच्या कालावधीनंतर इमारत साकार होणार आहे. इमारतीच्या कोनशिला समारंभा करीता प्रथमच सर्वोच्च न्यायालयाचे आणि उच्च न्यायालयाचे मुख्य न्यायमूर्ती हे शनिवारी बुलढाण्यात येणार आहे. २२ ऑगस्ट रोजी पत्रकार भवनात वकील संघाच्या वतीने आयोजित पत्रकार परिषदेत वकील संघाचे अध्यक्ष ॲड. विजय सावळे यांनी याबाबतची माहिती दिली.

बुलडाणा येथील जिल्हा न्यायालयाच्या नूतन इमारतीचा कोनशिला समारंभ शनिवारी, २४ ऑगस्टला सकाळी ११ वाजता होणार आहे. सात मजल्याची ही नवीन इमारत असणार आहे. सर्वोच्च न्यायालयाचे न्यायमूर्ती श्री. भूषण रा.गवई यांच्या शुभहस्ते कोनशिला समारंभ होणार आहे. या सोहळ्याला सर्वोच्च न्यायालयाचे न्यायमूर्ती.श्री.प्रसन्न वराळे, उच्च न्यायालय मुंबई चे मुख्य न्यायमूर्ती श्री. देवेंद्र कुमार उपाध्याय हे प्रमुख पाहुणे म्हणून उपस्थित राहणार आहेत. उच्च न्यायालयाचे न्यायमूर्ती तथा बुलडाणा जिल्ह्याचे पालक न्यायाधीश श्री. नितीन वा. सांबरे यांच्या अध्यक्षतेखाली हा कार्यक्रम होणार असून प्रमुख जिल्हा व सत्र न्यायाधीश श्री.स्वप्निल चंद्रकांत खटी यांची प्रमुख उपस्थिती या कार्यक्रमाला लाभणार आहे. कोनशिला समारंभनंतर सहकार विद्या मंदिराच्या सभागृहात माननीय न्यायमूर्तींच्या प्रमुख उपस्थितीत स्वागत समारोह व कायदेशीर जनजागृतीचा कार्यक्रम देखील पार पडणार असल्याची माहिती वकील संघाचे अध्यक्ष ॲड. विजय सावळे यांनी दिली.

पोलिसांचा तगडा बंदोबस्त…

सर्वोच्च न्यायालयाच्या न्यायमूर्तींना झेड दर्जाची सुरक्षा असल्याकारणाने पोलीस प्रशासनाने चोख बंदोबस्ताचे नियोजन केले आहे.स्वतः जिल्हा पोलीस अधीक्षक सुनील कडासने यांच्या मार्गदर्शनात बंदोबस्ताचे नियोजन केले आहे.