खामगाव – आपलं बुलढाणा जिल्हा बातमी: संत निरंकारी मिशनची सामाजिक शाखा संत निरंकारी चॅरिटेबल फाऊंडेशनच्या वतीने रविवार दिनांक 1 सप्टेंबर रोजी संत निरंकारी सत्संग भवन, खामगांव या ठिकाणी आयोजित केलेल्या रक्तदान शिबीराला उत्स्फूर्त प्रतिसाद मिळाला असून 187 जणांनी रक्तदान केले आहे.या शिबिरासाठी प्रमुख अतिथी शिवाजी नगरचे ठाणेदार तसेच अध्यक्षस्थानी मुक्तेश्वर आश्रम चे प्रमुख उपस्थित होते. स्थानिक संयोजक यांनी उपस्थित मान्यवर तसेच रक्तदात्यांचे स्वागत केले.संत निरंकारी मिशनच्या माध्यमातुन मानवतेच्या कल्याणार्थ वेळोवेळी संपूर्ण विश्वामध्ये अनेक जनसेवेचे उपक्रम आयोजित करण्यात येतात. स्वच्छता अभियान, वृक्षारोपण, निशुल्क आरोग्य तपासणी, नैसर्गिक संकटाच्या वेळी सहायता आदी सेवांचा समावेश आहे. आपण मानव आहोत. रक्तदान करणे हे आपले मानवीय कर्तव्य आहे. रक्तदानाच्या माध्यमातून खऱ्या अर्थाने आपण दुसऱ्या व्यक्तीशी रक्ताचे नाते जोडू शकतो असा सुदंर संदेश यावेळी देण्यात आला.
यावेळी रक्त संकलन जिल्हा शासकीय रूग्णालय खामगाव ब्लड बँक, अकोला जिल्हा शासकीय रूग्णालय ब्लड बँक यांच्या माध्यमातून करण्यात आले. या शिबिरासाठी खामगांव तसेच आजुबाजूच्या परिसरातील युवकांनी भरभरून रक्तदान करून मानवतेच्या या महान यज्ञरूपी कार्यामध्ये आपले अतुलनीय योगदान दर्शविले.
