श्री क्षेत्र लोणी यात्रेत भक्तांची मांदीयाळी

लोणी ( आपलं बुलढाणा जिल्हा बातमी)संतश्रेष्ठ श्री सखाराम महाराजांच्या १४६ व्या पुण्यतिथी निमित्त महाराजांच्या समाधीचे दर्शन घेण्यासाठी श्री श्रेत्र लोणी येथे भक्तांचा जनसागर उसळला असून, भाविक भक्तांनी शांततेत संत सखाराम महाराजांचे दर्शन घेऊन प्रसादाचा लाभ घेतला. जिल्ह्यातीलच नव्हे तर विदर्भातील लाखो भक्तांचे श्रद्धास्थान असलेल्या संत श्रेष्ठ श्री सखाराम महाराज श्री क्षेत्र लोणी येथे यात्रा महोत्सव सुरु झाला आहे.

वाशिम जिल्हातील रिसोड तालुक्यातील लोणी येथे ३० नोव्हेंबर २०२४ रोजी संतश्रेष्ठ श्री सखाराम महाराजांची पुण्यतिथी व महापंगत संपन्न झाली. संत सखाराम महाराजांच्या दर्शनासाठी विदर्भ तसेच मराठवाड्यातून लाखोच्या संख्येने भक्तांनी गर्दी केली. लोणी येथील रस्ते भक्तांच्या गर्दीने फुलून गेले होते.

संत सखाराम महाराज मंदिरात विधिवत पूजा अर्चना आरती झाल्यावर संतश्रेष्ठ श्री सखाराम महाराजांचे दर्शन घेऊन भक्तांनी प्रसादाचे सेवन केले. संत सखाराम महाराजांच्या महाप्रसाद मध्ये पुरीला अनन्य साधारण महत्व असून हा पुरीचा प्रसाद भक्त घरी नेऊन आपल्या धान्याच्या कोठारात किंवा पैशाच्या तिजोरीत ठेवतात. धान्याला बरकत येते, वैभव प्राप्त होते अशी भाविकांची यामागे धारणा असल्याचे सांगण्यात येते. या महोत्सवादरम्यान भक्तांची गैरसोय होणार नाही याची विशेष काळजी घेतली गेली. शेकडो स्वयंसेवकानी महाप्रसाद वितरणासाठी श्री चरणी सेवा दिली.

केंद्रीय आयुष मंत्री प्रतापराव जाधव यांच्या हस्ते महाप्रसाद

केंद्रीय मंत्री खासदार प्रतापराव जाधव माजी यांच्या हस्ते महाप्रसाद वितरण करण्यात आले . आमदार संजय रायमुलकर शिवसेना जिल्हाप्रमुख बळीराम मापारी शिवछत्र मित्र मंडळाचे अध्यक्ष नंदकिशोर मापारी किशोर भाऊ पांडुरंग मुंडे अरुण गीते प्रवीण बरले चंद्रकांत बरले सरपंच. माजी शहर प्रमुख अशोक वारेआदी मान्यवर उपस्थित होते.