लवकरच पत्रकारांच्या व्यापक आरोग्य शिबीराचे आयोजन…

बुलढाणा:- आपलं बुलढाणा जिल्हा बातमी:-  मराठी पत्रकार परिषद संलग्नित बुलढाणा जिल्हा पत्रकार संघाच्या नवीन कार्यकारिणीचा केंद्रीय आयुष आरोग्य व कुटूंब कल्याण राज्यमंत्री ना. प्रतापराव जाधव यांनी सहृदय सत्कार केला. यावेळी बुलढाणा जिल्हा पत्रकार संघाचे अध्यक्ष रणजीतसिंग राजपूत यांनी पत्रकारांसाठी व्यापक स्तरावर आरोग्य शिबीराची मागणी केली. या मागणीला तात्काळ होकार देत केंद्रीय मंत्री ना. जाधव यांनी लवकरच यासाठी आयुष मंत्रालय पुढाकार घेईल आणि पत्रकारांसाठी सर्वदायी आरोग्य शिबीर आयोजित करू, असे आश्वस्त केले.

जिल्हाधिकारी कार्यालय परिसरात असलेल्या खासदार यांच्या कार्यालयात हा सत्कार समारोह पार पडला. बुलढाणा जिल्हा पत्रकार संघाच्या नवीन कार्यकारिणीचे नुकतेच गठन करण्यात आले आहे. यात जिल्हाध्यक्ष म्हणून रणजीतसिंग राजपूत यांची अविरोध निवड झाली. दिल्लीत असल्यामुळे केंद्रीय मंत्री ना. जाधव यांनी मोबाईलवरून कार्यकारिणीचे अभिनंदन केले होते. आज, बुलढाणा येथे दौर्‍यावर आल्यानंतर केंद्रीय मंत्रीमहोदयांनी जिल्हाध्यक्ष रणजीतसिंग राजपूत तसेच सरचिटणीस कासिम शेख, कार्याध्यक्ष वसीम शेख, सहसचिव शिवाजी मामलकर, महिला सेल जिल्हाध्यक्ष कु. मृणाल सावळे, सोशल मिडीया प्रमुख संजय जाधव यांचा शॉल, श्रीफळ तसेच फेटा नेसवून सत्कार केला. याशिवाय मराठी पत्रकार परिषदेच्या राज्यउपाध्यक्षपदी चंद्रकांत बर्दे यांची आणि अधिस्वीकृती परिषदेच्या सदस्यपदी राजेंद्र काळे यांची नियुक्ती झाल्याबद्दल त्यांचाही सत्कार करण्यात आला. पत्रकार प्रा. युवराज वाघ यांनी सत्कार सोहळ्याचे संचलन करीत केंद्रीय मंत्र्यांना नवीन कार्यकारिणीचा परिचय दिला. यावेळी केंद्रीय मंत्री यांचे स्वीय सहाय्यक डॉ. गोपाल डिके, चंद्रकांत काटकर, पत्रकार सर्वश्री विश्वास पाटील, गजानन काळुसे, श्रीमती सुरेखा सोमनाथ सावळे यांची प्रमुख उपस्थिती होती.